Kya Ho Jab Ladka Shaadi Ke Baad Sasuraal Jaakar Patni Ka Saath De?

Hamaare samaaj mein ek parampara hai—shaadi ke baad ladki apna ghar-chhodd kar sasuraal jaati hai, apne pati aur uske parivaar ki zimmedaari uthaati hai. Yeh ek aam soch ban chuki hai ki ghar ki bahu hi naye parivaar mein adjust karegi, unki seva karegi aur naye rishte nibhayegi. Lekin agar hum iss parampara ko ulta sochkar dekhein toh? Kya ho agar ladka shaadi ke baad apni patni ke ghar jaakar uska saath de, uske maa-baap ki zimmedaari uthaaye?

Yeh Soch Itni Ajeeb Kyun Lagti Hai?

Jab ek ladki apne maa-baap ko chhodd kar pati ke ghar jaakar naye rishton ko apnati hai, toh usse “samajhdaar” aur “acchi bahu” kaha jaata hai. Lekin jab baat ladke ki aati hai, toh yeh soch logon ko ajeeb lagti hai. Kyun? Kya sirf ladkiyon ki zimmedaari hai ki woh ghar aur parivaar ki dekhbhaal karein? Kya ek ladka apni patni ke maa-baap ka dhyaan nahi rakh sakta?

Samaaj Ka Drishti Kon Aur “Ghar Jamai” Ka Tag

Jo ladke apni patni ke ghar mein shaadi ke baad rehte hain, unhe aksar “ghar jamai” kehkar chidhaya jaata hai. Samaaj unhe aalsi, biwi ka gulam ya phir bina self-respect wala maan leta hai. Lekin jab ladki apni sasuraal mein rehti hai, toh use bina kisi sawaal ke accept kar liya jaata hai.

Haqeeqat yeh hai ki ek ladka agar apni patni ke ghar jaakar uske parivaar ki responsibility le, toh usme koi burai nahi hai. Har rishta samaan hona chahiye—agar ek ladki apne pati ke maa-baap ki seva kar sakti hai, toh ek ladka bhi apni patni ke maa-baap ki seva kar sakta hai.

Ladka Sasuraal Mein Rahe Toh Kya Fayde Ho Sakte Hain?

1. Dono Parivaar Ka Barabar Samman – Yeh ek tarika ho sakta hai dono parivaaron ko ek jaisa maan-sammaan dene ka.
2. Ladki Ke Maa-Baap Ka Sahara – Jaise ladka apne maa-baap ka dhyaan rakhta hai, waise hi patni ke maa-baap bhi apni beti ke saath ek sukhmay jeevan jee sakenge.
3. Samaaj Mein Naya Nazariya – Yeh ek naya sochne ka tareeka ho sakta hai jo gender equality ko badhava de.
4. Better Understanding Aur Support – Jab ladka apni patni ke ghar rehta hai, toh dono ek dusre ki feelings ko aur achhe se samajh sakte hain.

Parivartan Ki Zaroorat Hai

Har rishte mein samaan adhikaar hona chahiye. Yeh zaroori nahi ki sirf ladki hi apni purani zindagi ko chhodd kar naye ghar mein adjust kare. Agar ladka bhi kabhi apni patni ke ghar jaakar uske parivaar ka sahara bane, toh isme kuch bhi galat nahi hai.

Samaaj ko chahiye ki woh apni soch badle aur yeh samjhe ki shaadi ek do tarfa rishta hai—sirf ladki ki zimmedaari nahi, balki dono ki zimmedaari hai. Jab ek ladka apni patni ke ghar jaakar uska saath de, tabhi ek sachchi barabari ka ehsaas hoga.

About The Author